NOLA FUNTZIONATZEN DUTE?
Pentsioak ordaintzen dituzten BGAE-en xedea da aldizka errenta moduan jasotzen den (urtean 14 ordainsari) Gizarte Segurantzaren pentsio publikoa osatzea. Ildo horretan, BGAE-en prestazioak ere aldizka eta errenta moduan kobratzea izango litzateke aukerarik onena, helburu berberarekin.
Komenigarria da honako gai hauek kontuan hartzea:
Normalean babestuta dauden egoerak
- Erretiroa
- Ezintasun iraunkorra
- Heriotza
- Gaixotasun larria
- Iraupen luzeko langabezia
Erreskate-eskubidea
Banakako eta elkartutako BGAE-etan berreskuratu daitezke, oro har, eskubide ekonomikoak, BGAE bati lehen ekarpena egin zitzaion egunetik 10 urte igaro ostean.
Fiskalitatea
-
Hartzekoetan (prestazioak eta erreskateak), (i) enpresa-ekarpenei eta -kontribuzioei dagokien zatia eta (ii) lortutako errentagarritasunari dagokion zatia bereizten dira; horrela, lehenengo zatiak lanaren etekin gisa tributatuko du, eta lortutako errentagarritasuna kapital higigarriaren etekin gisa.
-
Kapital gisa jasotako zenbatekoen % 70eko integrazio-ehunekoa ekarpenei eta kontribuzioei dagokien zatiari bakarrik aplikatuko zaio. Hala ere, 2025eko abenduaren 31n indarrean zegoen araudia ( % 60ko integrazioa) 2026ko urtarrilaren 1a baino lehen egindako ekarpen eta kontribuzioen ondorioz kapital gisa jasotako prestazioen zatiari aplikatu ahal izango zaio.
-
Oro har, salbuetsita geratzen da errenta gisa jasotako prestazioen errentagarritasuna, baldin eta eratutako errenta biziartekoa bada, edo, aldi baterakoa bada, gutxienez 15 urteko iraupena badu eta zenbateko konstantea badu; nolanahi ere, arrazoi tekniko eta finantzarioek eragin ditzaketen aldaketak gerta daitezke, baina Araban eta Gipuzkoan salbuespena errenta gisa jasotako prestazioaren zenbatekoaren % 40ra mugatzen da.
-
Errentagarritasun positiboa subsidiarioki kalkulatzeko metodo bat ezartzen da, BGAEak Zerga Administrazioari eskubide ekonomikoen errentagarritasunari buruzko informazioa eman ez dionean (prestazioen jasotzailearen antzinatasun-urte bakoitzeko jasotako prestazioaren zenbatekoaren % 1, % 35eko mugarekin) edo, hala badagokio, hartzaileak gizarte-aurreikuspeneko sisteman duen antzinatasunari buruzko informazioa eman ez dionean (jasotako prestazioaren % 25).
-
Desgaitasunen bat duten pertsonek beren eskubide ekonomikoak errenta gisa jasotzen badituzte, lanbide arteko gutxieneko soldata halako hiru arteko salbuespena izango dute, baldin eta legez desgaituak badira.
